ನಾವು

ಕೂಳಿಲ್ಲದೆ ಕೊರಗುವವರು
ನಾವು ಹಸಿದ ಹುಲಿಗಳು
ಮೇಲಿರುವರ ಸುಳ್ಳು ಸುಲಿದು
ನೆಗೆಯಲಿರುವ ಕಲಿಗಳು

ಕಷ್ಟಪಟ್ಟು ದುಡಿದರೂನೆ
ನಮಗೆ ಕೂಳು ದೊರೆಯದು
ದುಡಿಯದಿರುವ ಯಜಮಾನರ
ಮಜವ ಹೇಳ ತೀರದು

ದೇವ್ರು ಮತವ ಮುಂದೆ ಮಾಡಿ
ನಮಗೆ ಮೋಸ ನಡೆದಿದೆ
ಅನ್ಯಾಯಕೆ ಅನ್ಯಾಯ
ಮುಯ್ಯಿಗೆ ಮುಯ್ ಮುಂದಿದೆ

ತತ್ವಗಿತ್ವ ಬೇಡ ನಮಗೆ
ಬೇಕು ನಮಗೆ ಅನ್ನವು
ಗುರುವುಗಿರುವು ಬೇಡ ನಮಗೆ
ಬೇಕು ವಸತಿ ವಸನವು

ಭಯಭೀತಿಯ ಬೇರುಸಹಿತ
ಕಿತ್ತು ಮುಂದೆ ನಡೆವೆವು
ವಿಷಜಂತುವ ಹುಡುಕಿ ತಡಕಿ
ಹಿಡಿದು ತಂದು ಕಡಿವೆವು

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು