ತಬರನ ಹಾಡು

ಎಚ್ಚರವಿಲ್ಲದ ಕತ್ತಲ ನಾಡಿಗೆ
ಎಂದಿಗಯ್ಯ ಬೆಳಕು
ಎಲ್ಲೆಡೆ ಬೆಳೆಯುವ ಸಾವು ಸಂಕಟಕೆ
ಇಲ್ಲವೇನು ಕೊನೆಯು

ಉಳ್ಳವರೆಸೆದ ಗಾಳಕೆ ಸಿಕ್ಕಿ
ಸ್ವಾತಂತ್ರ್ಯವು ಬರಿ ಗೋಳಾಯ್ತು
ಯೋಜನೆಯೆಲ್ಲ ಯೋಜನ ದೂರ
ಹಸಿವೆಯೆ ಬಡವನ ಬಾಳಾಯ್ತು

ಇದ್ದೊಂದು ಓಟನು ಮಾರಿಕೊಂಡರು
ಹಸಿರು ನೋಟುಗಳಿಗೆ
ತನು ಮನ ಧನವನು ಅರ್ಪಿಸಿಬಿಟ್ಟರು
ಲಾಟಿ ಬೂಟುಗಳಿಗೆ

ಅಧಿಕಾರದ ಮದ ಕುಣಿಯುತ್ತಿತ್ತು
ಕುರ್ಚಿ ಕುರ್ಚಿಯಲ್ಲಿ
ಬಡವನ ರಕ್ತ ಹರಿಯುತ್ತಿತ್ತು
ಬೀದಿ ಬೀದಿಯಲ್ಲಿ

ಬಿಳಿಯ ಟೋಪಿಗಳ ಬಿಳಿಯ ಮೋಡಗಳ
ನಂಬಿ ಕುಂತ ಜನರು
ಸುಳ್ಳು ಭಾಷಣದ ಹಳ್ಳಕ್ಕೆ ಬಿದ್ದು
ದಿಕ್ಕು ಕೆಟ್ಟರಯ್ಯ

ನಿಲ್ಲುವುದೆಂದಿಗೆ ಕುಂತ ಜನಗಳು
ಕೋಪಗೊಂಡು ಕೆರಳಿ
ಹರಿಯುವುದೆಂದಿಗೆ ಜನಪ್ರವಾಹ
ಕೆಂಪು ಹೂವು ಅರಳಿ

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು