ಚಳಿಯ ಹಾಡು

ಚಳಿಯು ಬಂತಲ್ಲಾ
ಇಳೆಯ ಮೇಲೆ ಚಳಿಯು ಬಂತಲ್ಲ
ಮಂಜಿನ ಕಂಬಳಿ ಹೊದ್ದುಕೊಂಡು
ಮಾತೇ ಇಲ್ಲದ ಕಳ್ಳನ ರೀತಿ
ಬಾಗಿಲ ಕಿಂಡಿ ತೂರಿತ್ತು
ಕಂಡವರನ್ನು ಹಿಡಿದಿತ್ತು

ಮರಗಳಿಗೆಲ್ಲ ಮಂಜಿನ ಟೋಪಿ
ಬೆಟ್ಟದ ಸಾಲಿಗೆ ಬೆಳ್ಳಿಯ ಬಟ್ಟೆ
ಕಂಡಲ್ಲೆಲ್ಲಾ ಇಬ್ಬನಿ ಹಬ್ಬ
ಬಂದವರಾರೋ ಹೋದವರಾರೋ
ತಿಳಿಯುವುದೇ ಇಲ್ಲ

ಗಡಗಡ ಎಂದು ನಡುಗಿಸುತ್ತಿತ್ತು
ತಬಲ ಬಡಿದವು ಹಲ್ಲುಗಳು
ಕುಣಿದವು ಕಯ್ಯಿ ಕಾಲುಗಳು
ಬಡವರ ಬಿಡಲಿಲ್ಲ
ಹಣವಂತರ ಬಿಡಲಿಲ್ಲ
ಫ್ಯಾಷನ್ ಹುಡುಗಿಯ ಬಿಡಲೇ ಇಲ್ಲ
ಚಳಿಯು ಬಂತಲ್ಲ
ಇಳೆಯ ಮೇಲೆ ಚಳಿಯು ಬಂತಲ್ಲ

ಮಲಗಿದ್ದವರನ್ನು ಕೂರಿಸಿತು
ಕುಂತವರನ್ನು ನಿಲ್ಲಿಸಿತು
ನಿಂತವರನ್ನು ಓಡಿಸಿತು
ಚಳಿಯು ಬಂತಲ್ಲ
ಚಳಿಯನು ಗೆಲ್ಲುವ ವೀರನು ಕಾಫ಼ಿ
ಕುಡಿಯಲು ಕಾಸಿಲ್ಲ
ಕಾಫ಼ಿ ಕುಡಿಯಲು ಕಾಸಿಲ್ಲ

ಚಳಿಗೆ ಹೆದರಿ ಗಂಡು ಹೆಣ್ಣು
ತಿನ್ನಲು ಹೋಗಿ ಪ್ರೀತಿಯ ಹಣ್ಣು
ಮಕ್ಕಳಾದವಲ್ಲ
ಮನೆಮನೆಯಲ್ಲಿ ಊರಿನ ತುಂಬ
ಕುಣಿದು ನಿಂತವಲ್ಲ

ಗಯ್ಯಾಳಿ ಹೆಂಡತಿ ಕಾಟದಿಂದ
ತಪ್ಪಿಸಿಕೊಂಡ ಸಂತಸದಿಂದ
ಮುಂಜಾನೆಯಲಿ ಗುಮಾಸ್ತನೊಬ್ಬ
ಡೂಟಿಗೆ ಹೊರಟಿದ್ದ
ಬಾಗಿಲು ದಾಟಿ ಬಂದಿದ್ದೇ ತಡ
ಮೂಗಿನ ಮೇಲೆ ಭಾರಿ ಹೊಡೆತ
ಚಳಿಯು ಹಿಡಿದಿತ್ತು
ಹೊಂಚು ಹಾಕಿ ಚಳಿಯು ಹಿಡಿದಿತ್ತು

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು