ಗುಡಿಗೆ ಹೋಗುವವರ ಹಾಡು

ಗುಟ್ಟಿನ ಲೋಕದ ಗುಡಿಗೆ ಹೋಗವೆವು
ಶತಮಾನದ ಸುಳ್ಳನು ಒಡೆದು
ಹೊಸಬಾಳ ಪಯಣದಲ್ಲಿ
ನಾವಿಟ್ಟು ಮೊದಲ ಹೆಜ್ಜೆ

ಕೆಟ್ಟು ನಿಂತಿರುವ ಕಾಲದ ರಥವನು
ಎಳೆಯುತೀವಿ ಮುಂದೆ
ಸಮತೆಯ ಹೂಗಳು ಚೆಲ್ಲಿದ ಪಥವನು
ತುಳಿಯುತೀವಿ ನಾವು

ಮರೆತು ಹೋಗಿರುವ ಗುರುತು ಸಿಗದಿರುವ
ನಮ್ಮ ಸೊಲ್ಲೆ ಬನ್ನಿ
ಜಗವೆಲ್ಲ ಕೇಳಲಿ ಅಚ್ಚರಿಗೊಳ್ಳಲಿ
ಹೊಸ ಮಾತನೊಂದೆ ಅನ್ನಿ

ದೇವರಿರುವನೊ ಎಂತು ಇರುವನೊ
ನೋಡುತೀವಿ ಇಂದು
ಆತಂಕದ ತಲ್ಲಣದಾಕ್ಷಣಕೆ
ಹಾತೊರೆಯುತೀವಿ ನಾವು

ಎಂದೂ ಬರದವರು ಇಂದು ಬರುವೆವು
ಏಳು ಮಂಜುನಾಥ
ಹೊರಗೆ ಉಳಿದವರು ಒಳಗೆ ಬರುವೆವು
ಬರಮಾಡಿಕೊಳ್ಳೊ ದೇವ

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು