ಕೊಳೆಗೇರಿಯ ಹಾಡು

ಬಡವರ ಜೋಪಡಿ ನೆಲಸಮವಾದ
ನೋವಿನ ಕಥೆ ಕೇಳಿ
ದುಡಿಯುವ ಜನಗಳ ಪ್ರಾಣವು ಹೋದ
ಗೋಳಿನ ಕಥೆ ಕೇಳಿ

ಮಹಾನಗರದ ಮಧ್ಯ ಭಾಗದಲಿ
ಬಡವರ ಗುಡಿಸಲು ಗುಂಪಿತ್ತು
ಕೂಲಿಯ ಮಾಡುವ ಗಾಡಿಯ ಎಳೆಯುವ
ಬೆವರನು ಸುರಿಸುವ ಜನವಿತ್ತು

ಬೀದಿಬೀದಿಯಲ್ಲಿ ಭಿಕ್ಷೆಯ ಎತ್ತುವ
ಮಕ್ಕಳ ಹಿಂಡು ಅಲ್ಲಿತ್ತು
ಬೀಡಿಯ ಹೊಗೆಯು ಮನೆಯೊಳಗಿತ್ತು
ಗುಡಿಸಲು ಗುಡಿಸಲ ತಬ್ಬಿತ್ತು

ಸಣ್ಣಸಂಗತಿಗು ಕೂಗಾಡುವ ಕುಣಿಯುವ
ಹೆಂಗಸರಾ ಪಡೆ ಅಲ್ಲಿತ್ತು
ಮಾಜೀ ರೌಡಿಯ ಕುಂಟು ನಡಿಗೆಯಲಿ
ಪೋಲೀಸರ ಏಟಿನ ಗುರುತಿತ್ತು

ಓಟಿನ ಕಾಲದ ಲೈಟಿನ ಕಂಬ
ಕತ್ತಲೆ ಚೆಲ್ಲಿತ್ತು
ಮನೆಗಳ ಮುಂದೆ ಹರಿಯುವ ಮೋರಿಗೆ
ತೂರಾಡುವ ಜನ ಬಿದ್ದಿತ್ತು

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು