ಕಪ್ಪು ದೇವತೆಯ ಕಣ್ಗಾವಲು

ಪ್ರೀತಿಯ ಗಂಗೆ ಹರಿಯುತಲಿರಲಿ
ಅಂತರಂಗದ ಕಣಿವೆಯಲಿ
ಮೈತ್ರಿಯ ಮಲ್ಲಿಗೆ ಪರಿಮಳವ ಬೀರಲಿ
ಎದೆಯಾಳದ ಹೂದೋಟದಲಿ

ದೀಪದ ಹುಳುಗಳು ದಾರಿಯ ತೋರಲಿ
ಕಗ್ಗತ್ತಲ ಈ ಕಾಡಿನಲಿ
ಪಾರಿವಾಳಗಳು ಪುಳುಕದಿ ಹಾರಲಿ
ಭಯದಲಿ ನಲುಗಿದ ಬಾನಿನಲಿ

ಉರಿಯಿದೆ ವಿಷವಿದೆ ಇರಿಯುವ ಅಲಗಿದೆ
ಎನ್ನುವ ಅಂಜಿಕೆ ಈಗೇಕೆ
ಕನಸು ಕವಿತೆಗಳ ಹುಣ್ಣಿಮೆಯಿರಲು
ಮುಂದಿನ ದುಗುಡದ ಮಾತೇಕೆ

ಮಣ್ಣಿನ ಋಣದಲಿ ಕಣ್ಣನು ತೆರೆದೆವು
ಬೆಳೆದೆವು ಬೆಳಕಿನ ಕರುಣೆಯಲಿ
ಕಪ್ಪು ದೇವತೆಯ ಕಣ್ಗಾವಲಿನಲಿ
ಅರಳಲಿ ಚೇತನ ಬಾಳಿನಲಿ

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು