ಕಪ್ಪು ಕಾಡಿನ ಹಾಡು

ಹರಕೆ ಹೊತ್ತರು ಹೊಸ ಹೆಣ್ಣು ಗಂಡು
ಒಂದು ಮಗುವಾಗಲೆಂದು
ರಾತ್ರಿಗಳ ಯಾತ್ರೆಯನು ಮಾಡಿದರು
ಮುಳುಗಿ ಎದ್ದರು ಪ್ರೇಮಕಾಮಗಳ
ಗಂಗೆ ಕಾವೇರಿಗಳಲಿ
ಹಸಿದು ಹೋರಾಡಿದರು
ಹೂವು ಕಬ್ಬಿಣವಾಗಿ ಕಬ್ಬಿಣವು ಕೆಂಪಾಗಿ
ಹಲವು ರೂಪಕೆ ಸಿಕ್ಕಿ
ಸೊಕ್ಕೇರಿ ಕುಣಿವ ತನಕ
ಮೂಳೆ ಲಟಲಟವಾಗಿ ಮಯ್ಯೆಲ್ಲ ಮಳೆಯಾಗಿ
ಜೀವ ಕಾರಂಜಿ ತೋಟದಗಲಕು ಚಿಮ್ಮಿ
ಹರಿವ ತನಕ
ಸಂಕೋಚಗಳಿಗಿರುವ ಹೊರಗಾದರು
ಚುಂಬನದ ಚಂದಕ್ಕೆ ಬೆರಗಾದರು

ಊರಂಚಿನಲ್ಲಿ ಜೋಪಡಿಯಲ್ಲಿ
ಅಳುವ ಹಾಡುವ ಸದ್ದು
ಸೂರಿಗೆ ಬಿಗಿದ ಹಗ್ಗ ತೂಗುವ ತೊಟ್ಟಿಲಿನಲ್ಲಿ
ಹೊಳೆವ ಅರಳುವ ಒಂದು ಕಪ್ಪು ಹೂವು
ತಿಪ್ಪೆಗುಂಡಿಯ ಕಡೆ ಹೋದ ಹುಡುಗರನ್ನು
ಚಪ್ಪಾಳೆ ತಟ್ಟಿ ಕರೆವ ದೆವ್ವಗಳ ಗುಂಪು
ಕಳ್ಳರಾಕಾರದಲಿ ತೇಲಿ ಬರುವ ಮೋಡಗಳ ಹಿಂಡು
ದೂರದಲಿ ಯಾರದೋ ಹೊಲದಲ್ಲಿ ಅಂಗಸಾಧನೆಯಲ್ಲಿ
ತೊಡಗಿರುವ ಕೊಲೆಗಡುಕರು
ಸುಡುಗಾಡಿನಲಿ ಹುಟ್ಟಿ ಸುತ್ತೆಲ್ಲ ಮೊಳಗುವ
ಸತ್ತವರ ಹಾಡು
ಆಕಾಶದಿಂದ ನೆಲಕ್ಕೆ ಚಕ್ಕನೆ ಜಿಗಿದು
ಜನದ ಮುಂದೆ ಕುಣಿದು
ಕಾಸುಕಿತ್ತು ಮುಗಿಲಲ್ಲಿ ಮರೆಯಾಗುವ
ಜುಂಜಪ್ಪ ಕುರ್ ಮಾಮಾಗಳ ಪಡೆ
ಆಗಾಗ ಬರುವ ಗುರು
ಭಯಭಕ್ತಿಯನು ಹಂಚಿ
ಮಿಂಚುವನು ಮರದಡಿಯಲ್ಲಿ
ದಿನವೂ ಬರುವ ಯಜಮಾನ
ದೂರದಲೇ ನಿಂತು ಗರ್ಜಿಸಿ
ಅಟ್ಟುವನು ಕೆಲಸಕ್ಕೆ ಆಳುಗಳನು

ನಡು ಹಗಲಿನಲ್ಲಿ ಕಪ್ಪುಮೋಡವು ಕೆರಳಿ
ಪುಕ್ಕಲು ಸೂರ್ಯನನ್ನು ಓಡಿಸಿಕೊಂಡು ಹೋಗಿ
ಜಗವೆಲ್ಲ ಕತ್ತಲಾಗಿ ಆಕಾಶ ಅಲುಗಾಡಿ ಅತ್ತು
ದಿನವೆಲ್ಲ ಮಳೆಯಾಯಿತು
ಕೂಲಿ ಕಂಬಳಕ್ಕೆಂದು ಮನೆಬಿಟ್ಟು ಹೋದ
ಅಪ್ಪ ಅವ್ವಂದಿರು ಹಿಂತಿರುಗಿ ಬರದೆ
ಮಕ್ಕಳಿಗೆ ಗೋಳಾಯಿತು

ಓಡಿ ಹೋದವನು ಮತ್ತೆ ಬಂದ
ಆಕಾಶಕ್ಕೆಸೆದ ಕಿತ್ತಲೆಯಂತೆ ತಕತಕನೆ ಕುಣಿದ
ಹಟ್ಟಿ ಹುಡುಗರು ಎದ್ದು ಮಳೆಯ ನೀರಿಗೆ ಇಳಿದು
ಮುಖ ತೊಳೆದು ಮನೆಕಟ್ಟಿ
ಸೇತುವೆಗಳ ನಿರ್ಮಿಸಿದರು

ಹಳೆಯಕಾಲದ ಹರಿದ ಗುರುಛತ್ರಿ
ಬಿಚ್ಚಿದರೆ ಗದೆ ಮುಚ್ಚಿದರೆ ಕತ್ತಿ
ಬಸವಣ್ಣ ಸರ್ವಜ್ಞ ಕನಕನುಡಿ ಬಳ್ಳಿಯನು
ನೆಟ್ಟರೆದೆಗೆ
ಕಪ್ಪು ಹುಡುಗನು ಕಂಡ
ನಕ್ಷತ್ರ ಕಿತ್ತ ಕನಸು
ಏಳೇಳು ಲೋಕವನು
ಸುತ್ತಿಳಿದ ಕನಸು

ಸಂಚಾರಕಾಯಿತು ಸಂಚಕಾರ
ತೆರೆದರೂ ಮುಚ್ಚಿರುವ ಗುಡಿ ಹೋಟೆಲು
ಇದ್ದರೂ ಸಿಗಲಿಲ್ಲ ಕೊಳದ ನೀರು
ಅಪ್ಪ ಅವ್ವನ ಒಡನಾಟದಲ್ಲಿ
ಧಣಿಯ ಕೊಟ್ಟಿಗೆಯಲ್ಲಿ ಹಬ್ಬದೂಟ
ಹೊಲೆತನದ ಬೆಂಕಿಯಲ್ಲಿ
ಸುಟ್ಟುಹೋದವು ಎದೆಯ ಹೂವು

ಈ ಊರ ಗುಡಿ ಗೋಪುರಗಳಿಗೆ ಬೆಂಕಿಹಚ್ಚಿ
ನನ್ನ ಸುಟ್ಟಂತೆ ಇವರನ್ನೂ ಸುಡಬೇಕು
ಉಳ್ಳವರ ಅಟ್ಟಹಾಸಕ್ಕೆ ಚಟ್ಟ ಕಟ್ಟಿ
ಸುಡುಗಾಡಿನಲ್ಲಿವರ ನೆಡಬೇಕು
ಎಂದು ಈ ಹುಡುಗ ಹೊರಟ
ಕಪ್ಪು ಕಾಡಿನ ಕಡೆಗೆ
ಜನದ ಕಡೆಗೆ

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು