ಕಂಡೆ ನನ್ನವಳ ಒಂದು ದಿವಸ

ಕೊಲೆಯ ಹಿಂದಿನ ರಾತ್ರಿ ಸೂರ್ಯ ಚಂದ್ರರ ಹಿಡಿದು
ಹಣದ ಪೆಟ್ಟಿಗೆಯಲ್ಲಿ ಕೂಡಿಟ್ಟರು
ಭಾರತದ ಬಾವುಟವ ಸುತ್ತಿ ಬಾಯಿಗೆ ತುರುಕಿ
ಕಿತ್ತುಕೊಂಡರು ಅವಳ ಮಾತುಗಳನು

ಕತ್ತಿಯನು ಹಿಡಿದವರು ಹತ್ತಾರು ಜನನುಗ್ಗಿ
ಎತ್ತಿಕೊಂಡರು ಅವಳ ಹಣ್ಣಿನಂತೆ
ಮುಖಕೆ ತುಬಕನೆ ಉಗಿಯಬೇಕೆನಿಸಿತವಳಿಗೆ
ಮುಖಗಳೇ ಇರಲಿಲ್ಲ ಬಂದವರಿಗೆ

ಸಪ್ತಸಾಗರವೆದ್ದು ಬರಸೆಳೆದುಕೊಂಡಂತೆ
ಕಾಮುಕರ ಸರಪಳಿಗೆ ಒಳಗಾದಳು
ಬೇಟೆಗಾರರು ಎಸೆದ ಬಲೆಯೊಡನೆ ಸೆಣಸುತ್ತ
ಪಂಜುಗಳ ಪಹರೆಯಲಿ ಮರೆಯಾದಳು

ಅವಳ ಬಾಳಿನ ಬಳ್ಳಿ ಉಕ್ಕಿನಪ್ಪುಗೆಯಲ್ಲಿ
ರಕ್ತವನು ಬಸಿಬಸಿದು ನೆಲಕುರುಳಿತು
ಕತ್ತಲೆಯ ರಾಕ್ಷಸರು ಪಣಕಟ್ಟಿ ಆಡಿದರು
ಕಣ್ಣಿನುಂಡೆಗಳ ಗೋಲಿಯಾಟ

ತಾಳಿಯನು ತೂಗಿದರು ಕುಡಿದು ಕೂಗಾಡಿದರು
ಮಾರವಾಡಿಯು ಅದಕೆ ಇಟ್ಟ ಬೆಲೆಗೆ
ಮಯ್ಯ ದಳಗಳನೆಲ್ಲ ಒಂದೊಂದನೇ ಹೊಸಗಿ
ಹೊತ್ತು ಹೊರಟರು ಅವಳ ಎತ್ತಲೋ?

ಕಂಡೆ ನನ್ನವಳ ಒಂದು ದಿವಸ
ಕಂಡೆ ನನ್ನನು ನಾನೆ ಕನ್ನಡಿಯಲಿ

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು