ಒಂದು ದನದ ಪದ

ಗೊಂತಿನ ಮುಂದೆ ನಿಲಿಸವರೆ
ಗೂಟಕೆ ನನ್ನ ಕಟ್ಟವರೆ
ಹಿಡಿಹಿಡಿ ಒಣಹುಲ್ಲ ಹಾಕಿ ತಾನೆ
ಮೆಚ್ಚಿಕೊಳ್ಳುತಾನೆ
ದೇವರಂಥ ಮನುಷ ನನ್ನೊಡೆಯ

ನನ್ನ ಬೆನ್ನ ಮ್ಯಾಲೆ ಬಾಸುಂಡೆ ಬರೆಯ ನೋಡಿ
ತನ್ನ ಬಲಕೆ ತಾನೆ ಮೆಚ್ಚಿ ಕೊಳ್ಳುತಾನೆ
ರಾಜನಂಥ ವ್ಯಗುತಿ ನನ್ನ ಧಣಿ

ಕೊಟ್ಟಿಗೇಲಿ ಕಟ್ಟಿ ನನ್ನ ಮಾತೆ ಮಾತೆ ಅನ್ನುತಾರೆ
ಮಾತಿಗೊಂದು ತೂಕ ಬ್ಯಾಡವ?
ಗಟ್ಟಿಹಾಲ ಕರೆದರೂನೆ ಹಾಲಿಗೆಲ್ಲ ನೀರಬೆರಸಿ
ಮಾರುತಾರಲ್ಲೊ ಮುಂದೇನೆ ಮಾರುತಾರಲ್ಲೊ

ಗಾಡಿದೊಂದು ಮರದ ತೂಕ ಇವರದೊಂದು ಭೀಮತೂಕ
ಹೆಜ್ಜೆ ಹಾಕೊ ಬಸವಣ್ಣ ಅನ್ನುತಾರಲ್ಲೊ
ಶಂಕರಾತ್ರಿ ಹಬ್ಬದೊಳಗೆ ಬೆಂಕಿಮ್ಯಾಲೆ ಹಾರಬೇಕು
ತಿಗವತೊಳೆದಿದ್ದರೂನೆ ಕೊಂಬಿಗೆಲ್ಲ ಹೂವಸಿಗಿಸಿ
ತಳ್ಳುತಾರಲ್ಲೊ ಬೆಂಕಿಗೆ ತಳ್ಳುತಾರಲ್ಲೊ

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು