ನಿನ್ನ ಕಣ್ಣಿನ ಮಾತು

ಪ್ರೀತಿ ಎಂಬುದು ಗೆಳತಿ
ಮಿಂಚುಗಳ ಮಾಲೆಯೇನೆ
ಪಾರಿವಾಳದ ಎದೆಗೆ ಗುರಿಯಿಟ್ಟು ಬಿಟ್ಟ
ಬಾಣಗಳ ದಾಳಿಯೇನೆ

ಸೋಂಪು ನಿದ್ದೆಯ ಒಳಗೆ
ಬಿದ್ದ ಬೆಂಕಿಯ ಕೂಗು
ಮೈ ಹಿಡಿದು ಕೈ ಕುಲುಕಿ
ಸುತ್ತ ಕುಣಿಯುವ ಸಾವು
ನೊಂದ ಜೀವಕೆ ತಂಪು ತಾರೆಗಳ

ತೋರಿಸುವ ನಿನ್ನ ಹಾಡು
ಗುಡುಗಾಗಿ ಮೊಳಗುತಿತ್ತು
ಸುಖ ತರುವ ನಿನ್ನ ಮುಖ
ಏನಾಯಿತೋ ಕಾಣೆ
ಏಳು ಲೋಕಗಳಾಚೆ ಇರುವ ಬೆಟ್ಟಗಳಲ್ಲಿ
ಅಡಗಿರುವ ಅರಮನೆಯ
ಗುರುತು ಸಿಗಲಿಲ್ಲ
ಜಾತಿ ಜಾತಿಯ ನಡುವೆ
ನಿಂತ ಸಾಗರದಲ್ಲಿ
ನಮ್ಮ ಪ್ರೀತಿಯ ಹಡಗು ಮುಳುಗಿತಲ್ಲೆ

ತುಂಬೆ ತೆಂಗುಗಳ ಅಂತರವು ಹತ್ತಿರವೆ
ಗುಡಿಯ ಗೋಪುರದೊಡನೆ
ಜೋಪಡಿಯ ಗರಿಗಳಿಗೆ
ನಂಟಾಗಲಿಲ್ಲ
ಒಣ ಮರಳು ಕಾಡಿನಲಿ
ಹೂ ಅರಳಲಿಲ್ಲ

ಚುಕ್ಕೆ ಚಂದಿರ ಹಾಲು
ಚೆಲ್ಲಲಿಲ್ಲ
ಕೂಗಿ ಕುಣಿಯುತ್ತಿದ್ದ
ಕುಡುಗೋಲು ಸುತ್ತಿಗೆಯು
ಉಳ್ಳವರ ಕುತ್ತಿಗೆಯ ಕತ್ತರಿಸಲಿಲ್ಲ
ಸುಟ್ಟ ಹೆಣಗಳ ಸಾಲು ಮೆರವಣಿಗೆ
ಬಂದಾಗ ಪುಟ್ಟ ಕಂದಮ್ಮಗಳ
ಚೀರಾಟಗಳ ನಡುವೆ
ನಿನ್ನ ಕಣ್ಣಿನ ಮಾತು ತಿಳಿಯಲಿಲ್ಲ

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು