ನನ್ನವಳಿಗೆ

ಕ್ರಾಂತಿಕನ್ಯೆ ಮೋಹಜನ್ಯೆ
ನಿನ್ನ ಮದುವೆ ಆಗುವೆ
ಕ್ರಾಂತಿ ಕಿಡಿಯ ಸಿಡಿಸುವಾಗ
ನಾನು ನಿನ್ನ ತಬ್ಬುವೆ

ಬಡಜನಗಳ ಬಂಡಾಯದಿ
ನಿನಗೆ ಮುತ್ತನೊತ್ತುವೆ
ಕ್ರಾಂತಿಜಯವ ಪಡೆವವರೆಗು
ನಿನ್ನ ಹಿಂದೆ ಸುತ್ತುವೆ

ಧರ್ಮಗುರುವ ಚರ್ಮ ಸುಲಿದು
ಸೀರೆಕುಬುಸ ಹೊಲಿಸುವೆ
ಮೋಸಗಾರ್ರ ಕೊರಳ ಕಡಿದು
ತಲೆಯ ಹಾರ ಹಾಕುವೆ

ಮೂಳೆ ಹಿಡಿದು ನಿನ್ನ ಮುಂದೆ
ಕೋಲುಯ್ಯುವೆ ಕುಣಿಯುವೆ
ವಂಚಕರನು ಗೋರಿಮಾಡಿ
ಹಾಲುಯ್ಯುವೆ ತಣಿಯುವೆ

ಗುಡಿಯಲಿರುವ ವಡವೆ ತಂದು
ನಿನಗೆ ವಡವೆ ಮಾಡುವೆ
ನುಗ್ಗಿತಂದ ಬೆಳ್ಳಿಯಿಂದ
ಕೈಗೆ ಬಳೆಯ ತೊಡಿಸುವೆ

ಹೀರಿದವರ ರಕ್ತದಿಂದ
ಮೈಗೆ ನೀರನುಯ್ಯುವೆ
ಮುದ್ದೆಯಾದ ಹೆಪ್ಪಿನಿಂದ
ಹಣೆಗೆ ಬೊಟ್ಟನಿಕ್ಕುವೆ

ಕೊಬ್ಬಿದವರ ಕರುಳ ಕಿತ್ತು
ಮುಡಿಗೆ ಹೂವ ಮುಡಿಸುವೆ
ಕ್ರಾಂತಿಯಲ್ಲಿ ನಿನ್ನ ಎದೆಗೆ
ನನ್ನ ಎದೆಯ ಒತ್ತುವೆ

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು