ಗೌಳಗಿತ್ತಿಯ ಹಾಡು

ಮಾವಿನ ತೋಪು ಫಲವತಿಯಾಗಿ
ಬಣ್ಣವೇರಿದಾಗ
ಪಟ್ಟಣದಿಂದ ನಮ್ಮೀ ಊರಿಗೆ
ಗಾಡಿಯೊಂದು ಬಂತು
ಗಾಡಿಯು ಬಂದು ಬೆರಗನು ತಂದು
ಸುಂದರಾಂಗ ಇಳಿದ

ಊರ ಹುಡುಗಿಯರು ಮರವನು ಹತ್ತಿ
ಹಣ್ಣ ಕೀಳುವಾಗ
ಚಿಗುರು ಮೀಸೆ ಹುಡುಗ
ಮರದ ಕೆಳಗೆ ನಿಂತು
ನೋಡಬೇಕಾದ್ದ ನೋಡೇ ಬಿಟ್ಟ
ತುಂಟ ನಗೆಯನು ನಕ್ಕೇ ಬಿಟ್ಟ
ಹೊಳೆವ ಕಣ್ಣ ಹುಡುಗ

ಮಾವಿನ ಹಣ್ಣನು ತಿನ್ನಲು ಕುಂತರೆ
ಹುಡುಗನ ಸವಿನೆನಪು
ಮನಸನು ಕದ್ದು ದೂರಕೆ ಹೋದ
ತುಂಟನ ಸವಿನೆನಪು

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು