ಕ್ರಾಂತಿಪದ

ಗುಡಿಸಿಲುಗಳು ಗುಡುಗುತಿವೆ ಬಂಗಲೆಗಳು ನಡುಗುತಿವೆ
ಎಲ್ಲೆಲ್ಲಿಯು ಮೊಳಗುತ್ತಿದೆ ನವಕ್ರಾಂತಿಯ ಗಾನ
ಮತಗಳು ಹತವಾಗುತಿವೆ ಜನಪಥಗಳು ಮೂಡುತಿವೆ
ಅಸಮಾನತೆ ಆಗುತ್ತಿದೆ ಕ್ರಾಂತಿಗೆ ಸೋಪಾನ

ರೈಲು ನಿಲುವ ತಾಣದಲಿ ಭಾರ ಹೊತ್ತ ರಟ್ಟೆಯಲಿ
ತೊಟ್ಟಿಕ್ಕಿದ ಬೆವರಿನಹನಿ ಬೆಂಕಿಯಾಗಿ ಸಿಡಿದು
ಬಡಜನಗಳ ಕಣ್ದೆರೆಸಿ ಶೋಷಕರನು ಕಂಗೆಡಿಸಿ
ಕೆಂಗಿಡಿಗಳ ಕಾರುತ್ತಿದೆ ಘೋರಾರ್ಭಟವಾಗಿ

ದೇವರುಗಳ ಪೂಜೆಯಲಿ ಗುರುವರ್ಯರ ದಾಸ್ಯದಲಿ
ಇಹಲೋಕಕು ಪರಲೋಕಕು ಸೇತುವೆಯನು ಕಟ್ಟಿ
ಪರಮಾತ್ಮನ ಪರದೆಯಲಿ ಜೀವಾತ್ಮನ ಕಬಳಿಸುವ
ಕಡುಜಾಣರ ಕೊಂದುತಿಂದು ಅನ್ಯಾಯವ ಮೆಟ್ಟಿ

ಕರ್ಮಕಥೆಯ ಚಾಟಿಯನು ಮುರಿದಿಕ್ಕುತ ಮುನ್ನಡೆದು
ಹಿಮ್ಮೆಟ್ಟಿಸಿ ಅಡ್ಡಬಂದ ಪಟ್ಟಭದ್ರ ಹಿತವ
ಮಿಡಿಯುತಲಿದೆ ಎದೆಗಳಲಿ ದಬ್ಬುತಲಿದೆ ಜಡತೆಯನು
ಚಿಮ್ಮುತಿರುವ ಹೋರಾಟವು ಹೊಮ್ಮಿ ಮುಗಿಲಿಗೇರಿ

ದಲಿತರಾಗ ಗುನುಗುತಿದೆ ಗೋರಿಯ ಕರಿಬಿರುಕಿನಲಿ
ಶೋಷಣೆಯಲೆ ಶ್ರಿಂಗಾರವು ಆಯಿತೆನ್ನ ಹೆಣಕೆ
ಸುಲಿದವರನು ಸುಲಿವದಿನ ಬಂದಿತೆಂದು ಹಿಗ್ಗುತಿದೆ
ಸುಡುಗಾಡಿನ ಬಿರುಗಾಳಿಯು ಕ್ರಾಂತಿಗೀತೆ ಹಾಡಿ

-
ಕವಿ: ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು