ಸುಂಟರಗಾಳಿ

ಸುಂಟರಗಾಳಿಯೊಳಗೆ ಸಿಕ್ಕಿ ಥರಥರಗುಡುವ
ಗುರುಮಠದ ಧ್ವಜದಲ್ಲಿ ಧರ್ಮವಿಲ್ಲ
ಮೂಳೆ ತುಂಬಿದ ಹಣೆಗೆ ಸೊಟ್ಟಸೊಟ್ಟಗೆ ಬಳಿದ
ನಾಮವೀಭೂತಿಯಲಿ ಧರ್ಮವಿಲ್ಲ

ದಕ್ಷಿಣೆಯ ರುಚಿಯುಂಡು ಉಬ್ಬಿರುವ ಒಡಲಿನಲಿ
ಜುಟ್ಟು ಜನಿವಾರದಲಿ ಧರ್ಮವಿಲ್ಲ
ಊದುಕಡ್ಡೀಯ ಅರೆದು ಮೇಲೆದ್ದ ಧೂಮದಲಿ
ಧರ್ಮ ಸುಳಿಸುಳಿಯಾಗಿ ಸುಳಿವುದಿಲ್ಲ

ದಾರ ರುದ್ರಾಕ್ಷಿಗಳ ಭಾರ ಬಿಗಿತಕೆ ಬೆದರಿ
ದೂರ ಸರಿಯುತಲಿಹುದು ನೈಜಧರ್ಮ
ಜಾಗಟೆಯ ಆರ್ಭಟಕೆ ಬೌನಾಸಿಯಬ್ಬರಕೆ
ಕಿವಿಯೊಡೆದು ಓಡುತಿದೆ ಬಿದ್ದು ಧರ್ಮ

ಒಂದೊಂದು ಜೀವದಲಿ ಎದೆಯಂತರಾಳದಲಿ
ಅಡಗಿಹುದು ಪರಿಶುದ್ಧ ಧರ್ಮಸತ್ವ
ಮಾನವತೆಗಾಪತ್ತು ಬಂದೊಡನೆ ಸಿಡಿದೆದ್ದು
ರಕ್ಷಣೆಗೆ ನಿಲ್ಲುವುದು ಯೋಧನಂತೆ

ನಿಜಧರ್ಮವರಿಯದವ ಹಾಕಿಕೊಳುವನು ಕೊನೆಗೆ
ಶಿವದಾರ ಜನಿವಾರಗಳಿಗೆ ನೇಣು
ಅಂಧಭಕ್ತನ ಬುದ್ಧಿ ಗುಡಿಯ ಕೆಂಗಲ್ಲಿನಡಿ
ಜಜ್ಜಿ ಪುಡಿಯಾಗುತಿದೆ ಇದುವೆ ಸತ್ಯ

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು