ಶಬ್ದ

ಕುಣಿವ ಸುಂಟರಗಾಳಿ ಬೇಲಿದಾಟದ ಹಾವು
ಅಲೆವ ಹುಂಜನ ಸದ್ದೆ ಕೇಳಿಸಿದ್ದು
ಹೆಬ್ಬಂಡೆ ಮೇಲಿಂದ ಬಾಡಬಕ್ಕದ ಹೂವು
ಬಸವಳಿದು ಬಿದ್ದುದನೆ ಆಲಿಸಿದ್ದು

ನಡುಮನೆಯ ಗೋಡೆ ತೊಟ್ಟಿಲಿನಲ್ಲಿ ಮಲಗಿರುವ
ಡೋಲುವಾಲಗ ಡೊಳ್ಳ ಮೊರೆತವಿಲ್ಲ
ಕಾಗೆ ಕೋಗಿಲೆ ಹಕ್ಕಿ ಕೊಕ್ಕರೆಯ ಸಂತತಿಗೆ
ನೀರುನೆರಳಿಲ್ಲದೆಯೆ ಸೊಲ್ಲೆ ಇಲ್ಲ

ಅಂಗಡಿಯ ಸಾಲಿನಲಿ ಸಂದಣಿಯ ಸುಳಿವಿಲ್ಲ
ಚೌಕಾಸಿಯೂ ಇಲ್ಲ ಎಂದಿನಂತೆ
ಎಲ್ಲವೂ ಮಾರಾಟವಾಗಿಹುದು ಮುಂದೇನು
ದಳ್ಳಾಳಿ ಕಣ್ಣಲ್ಲಿ ಬೆಳೆದ ಚಿಂತೆ

ಮೈದುಂಬುವುದು ನಿಂತು ದೇವತೆಯ ಸೊಲ್ಲಡಗಿ
ಗುಡಿಸುತ್ತ ಕತ್ತಾಳೆ ಬೆಳೆಯಿತಲ್ಲ
ಜನಸಾಗರದ ಮುಂದೆ ಮಾತುಗಳು ಮಂಕಾಗಿ
ಮೌನವೇ ಮಡುಗಟ್ಟಿ ನಿಂತಿತಲ್ಲ

ಕಂಗೆಟ್ಟ ನಟ್ಟಿರುಳ ಭೇದಿಸುತ ಗಡಿದಾಟಿ
ಎದೆಮೀಟಿ ಬಂದದ್ದು ಯಾವ ಸದ್ದು
ಕೊಲೆಗಡುಕರಾಡುತಿಹ ಪಿಸುಮಾತೆ ಈ ದನಿಯು
ಅಂತರಂಗದ ಸಾವೆ ಕೇಳಿಸಿದ್ದು

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು