ವಿಜಯೋತ್ಸವ

ಧಣಿಗಳ ವಿಜಯೋತ್ಸವದಲ್ಲಿ
ನಮ್ಮಂಥವರಿಗೇನು ಕೆಲಸ

ಹಸು ಮಕ್ಕಳನ್ನು ತುಳಿದ ಗುಜ್ಜಾನೆಗಳ
ಗುಣಗಾನ ಮಾಡೋಣ
ಊರೂರಿಗೆ ಬೆಂಕಿಯಿಟ್ಟು ಲೋಕಕ್ಕೇ ಬೆಳಕಾದೆವೆಂದು
ಬೀಗುವವರನ್ನು ಅಭಿನಂದಿಸೋಣ
ದತ್ತಿ ಬಿಟ್ಟವರನ್ನು ದನಿಯೆತ್ತಿ ಹೊಗಳೋಣ

ಚಾಮುಂಡಿಯಿಂದ ಹತನಾದ ಮಹಿಷನೇ
ನಮ್ಮೂರಿನಲ್ಲಿ ಕದಿರನಾಗಿ ಹುಟ್ಟಿ
ಮಾರಮ್ಮನ ಗಂಡನಾಗಿ ತಲೆದಂಡವ ತೆತ್ತ
ಕದಿರನಾಗಿ ಹುಟ್ಟಿದ್ದು, ಅದನ್ನು ಮುಚ್ಚಿಟ್ಟಿದ್ದು
ಅವನ ಅಪರಾಧ
ಯಾಕೆಂದರೆ ಈ ದೇವತೆಗಳು
ಜಾತಿಜಾತಿಯ ನಡುವೆ ನಿಂತ ಎತ್ತರದ ಗೋಡೆಗಳು

ಬನ್ನಿಯಲಿ ಬಚ್ಚಿಟ್ಟ ಆಯುಧಗಳು
ಪ್ರಶ್ನೆ ಕೇಳುವ ಹುಡುಗ
ಬೆಲೆಯ ಕೇಳುವ ರೈತ
ಕೂಲಿ ಕೇಳುವ ಕಾರ್ಮಿಕನ ಮೇಲೆ
ಎರಗದಿರಲಿ

ಜೋಪಡಿಯಲ್ಲಿ ಉರಿಯುವ ಒಲೆಯ ಮೊರೆತದಂತೆ
ಬದುಕು ಸತ್ಯವಾಗಿರಲಿ
ಕಾಂಪೌಂಡು ಗೋಡೆಯ ಮೇಲೆ ಬರೆದ
ಕವಿತೆಯ ಸಾಲಿನಂತೆ ಸರಳವಾಗಿರಲಿ

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು