ಮೆರವಣಿಗೆ

ಮಲಗಿದ್ದ ಜನವೆದ್ದು ದನಿಯೆತ್ತಿ ಮೊಳಗಿಸಿದ
ಧಿಕ್ಕಾರಗಳ ನಡುವೆ ಬೆಳೆದ ಚೆಲುವೆ
ನರಭಕ್ಷಕರ ಬಂಗಲೆಯಂಗಳದಲ್ಲಿ
ಕ್ರಾಂತಿ ಕಣ್ಣಾಗಿ ಅರಳಿದವಳೆ
ಹಾರಿದೆವು ಜೋಡಿ ಪಾರಿವಾಳಗಳಾಗಿ
ತಡಿಕೆ ಗುಡಿಸಲ ಕೇರಿಮೇಲೆ
ನೇಗಿಲಿಗೆ ನೆಲವಾಗಿ ನೀರುಗೊಬ್ಬರವಾಗಿ
ಬಿತ್ತಿ ಬೆಳೆದೆವು ಕೆಂಡಗಳ ಫಸಲು

ನಾವು ಆಡಿದ ಮಾತು
ಭೂಲೋಕವನು ಮೀರಿ ಹಬ್ಬಿತ್ತು ದೇವಲೋಕ
ಕೆಂಬಾವುಟವ ಹಿಡಿದು ಹೊಂಟಿತು
ದೇವರುಗಳದೊಂದು ದೊಡ್ಡ ಮೆರವಣಿಗೆ
ಮೋಡಗಳ ನಾಡಿನಲಿ ಮಿಂಚುಗಳ ಘೋಷಣೆ
ಗುಡುಗು ಸಿಡಿಲುಗಳ ಸೆರಗಿನಲಿ ಕಟ್ಟಿಕೊಂಡೆ

ಚುಕ್ಕೆಗಳ ಲೋಕದಲಿ ಚಿಕ್ಕವನು ನಾನು
ಬೆಳ್ಳಿಬನ ಬೆಳ್ಳಿಹೂ ಬಿಳಿಯ ಮಾತುಗಳು
ಬೆಳಕುಂಡು ಬೆಳೆಯಬೇಕು
ಬಿಳುಪಾಯ್ತು ಬಾವುಟದ ಬಣ್ಣ
ನಾನಾದೆ ಸಣ್ಣ ಸಣ್ಣ
ನೀನಂದು ಬಲತುಂಬಿದೆ
ಮುನ್ನಡೆಸಿದೆ

ದೇವಮಾನವರೆಲ್ಲ ಒಂದಾದರು
ಪಂತ್ ನಗರದ ಸೀಳುನಾಯಿಗಳ ಹಿಡಿಯಲು
ಬೆಲ್ಚಿಯಲಿ ಅಡಗಿದ್ದ ರಾಕ್ಷಸರ ಕಾಣಲು
ಹೊಂಟಿತ್ತು ಮೆರವಣಿಗೆ ಸಾಲು ಸಾಲು

ಕಾಡುಗಳು ಚಲಿಸಿದವು
ಬೆಟ್ಟಗಳು ಬಯಲಾದವು
ಹಕ್ಕಿ ಹಕ್ಕಿಗಳಲ್ಲಿ ಧಿಕ್ಕಾರ ಹೊಮ್ಮಿತ್ತು
ಹೂವುಗಳು ಹಾವಾದವು

ಈ ಸಾಗರದ ಕೂಗಿನಲಿ ನಿನ್ನ ದನಿಯಿಲ್ಲ
ಕ್ರಾಂತಿ ಕಣಿವೆಯಲೆಲ್ಲೊ ಮರೆಯಾದೆಯ?
ಯಾರು ಎಳೆದರೆ ನಿನ್ನ
ಯಾರು ಸೆಳೆದರೆ ನಿನ್ನ
ನನ್ನಾಸೆ ಹಣ್ಣನು ಗಿಣಿಕಚ್ಚಿತೆ?

ನೂರು ನೋವಿನ ಮರಳಿನಲ್ಲಿ
ಹರಿಯುತ್ತಿದ್ದ ಗಂಗೆಯೆ
ಹತ್ತಿ ಉರಿದವು ಜಾಜಿಮಲ್ಲಿಗೆ
ಉರಿಬಿಸಿಲು ಮುಂಗಾರಿಗೆ

ಹೆತ್ತ ಹೆಣಗಳು ನೆಟ್ಟ ಮುಳ್ಳುಬೇಲಿಯ ನೀನು
ನೆಗೆಯಲಾರದೆ ಹೋದೆಯ?
ಒಂದಾದ ಮನಸುಗಳ ಪಾಲುಮಾಡಿದ ಜನರ
ಬಗೆಯಲಾರದೆ ಹೋದೆಯ?

ಯಾರು ಯಾರೋ ಅವರು?
ನನ್ನ ಮನಸಿನ ಕೊಂಬೆ ರೆಂಬೆಗಳ ಕಡಿದವರು
ಮಲ್ಲಿಗೆಯ ಬನಗಳಿಗೆ ಬೆಂಕಿಬರೆ ಎಳೆದವರು
ಹುಟ್ಟೂರು ಸುಟ್ಟವರು
ನನ್ನೆಲುಬುಗಳ ಕಿತ್ತು ನೆಕ್ಕಿ
ನಲಿದವರು ಯಾರೋ?

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು