ಮಸಣದ ಚೆಲುವೆಗೆ

ಕವನಗಳ ನಾಬರೆಯಲು
ಆಶ್ರಯಿಸಿದೆ ನಿನ್ನ
ನಗೆ ಚಿಮ್ಮಿಸಿ ಬಾರೆನ್ನುತ
ನೀನಪ್ಪಿದೆ ನನ್ನ

ಗೋರಿಯ ಮೇಲಣ ಮರಗಳ
ತಂಗಾಳಿಯ ತಂಪು
ಮರ್ಮರ ದನಿ ಮೊರೆಯುತ್ತಿದೆ
ಮೈಕಿವಿಗಳಿಗಿಂಪು

ಗಡಿಬಿಡಿಯಲಿ ಪಾರಾಗಲು
ನಾಬಂದೆನು ಇಲ್ಲಿ
ಸಂಭಾಷಿಸಿ ಸುಳಿದಾಡುವೆ
ನೀ ಮಾತಿನ ಮಲ್ಲಿ

ಉದ್ಯಾನದಿ ಸಾಗುತ್ತಿದೆ
ಸಿರಿವಂತರ ಮೋಜು
ನಾಬಡವನು ನನಗೇತಕೆ
ಉದ್ಯಾನದ ಗೋಜು

ಹೆಣದೊಡವೆಯ ಹೆಣಗುಬಸುವ
ಸತ್ತಿರುವರ ಸೀರೆ
ತೊಟ್ಟುಟ್ಟರು ನೀನಾಗಿಹೆ
ವೈಯಾರದ ನೀರೆ

ನೀನೆಯೆ ಸರಿ ನೀನೆಯೆಸಿರಿ
ನೀ ನನ್ನಯ ಹೆಣ್ಣು
ನಿನ್ನನು ನಾ ಮೆಚ್ಚಿರುವೆನು
ನೀ ಕಾವ್ಯದ ಕಣ್ಣು

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು