ಭವಿಷದ್ಗೀತೆ

ರ್ಮೋಡ ಕವಿದಿತ್ತು ಕಗ್ಗಪ್ಪು ಕೆದರಿತ್ತು
ಕಡುರೌದ್ರ ತುಂಬಿತ್ತು ಬಾನಿನಲ್ಲಿ
ಕ್ರಾಂತಿಕರೆಗೋಗೊಟ್ಟು ಕಪ್ಪುವಸ್ತ್ರವತೊಟ್ಟು
ಭೂದೇವಿ ನಿಂತಿತ್ತು ರಾತ್ರಿಯಲ್ಲಿ

ಅಸಮತೆಯ ಗುಡುಗಿನಲಿ ಸಂಕಟದ ಸಿಡಿಲಿನಲಿ
ಚಿಂದಿಬಟ್ಟೆಯಲೊಂದು ಮಿಂಚುಕಂಡು
ಬಿರುಗಾಳಿ ಬೀಸಿತ್ತು ಛೀರಾಟ ಚಿಮ್ಮಿತ್ತು
ದೂರದಾ ಕಾರ್ಮುಗಿಲ ಬಿರುಕಿನಲ್ಲಿ

ತೊರೆತುಂಬಿ ಹರಿದಿತ್ತು ಕೆರೆತುಂಬಿ ತುಳುಕಿತ್ತು
ಮಳೆಯಾಗಿ ಸುರಿದಿರಲು ಕೆಂಪುರಕ್ತ
ಕ್ರಾಂತಿಕಾರಿಯು ನುಗ್ಗಿ ಕೊಲೆಸುಲಿಗೆ ಗೈಯುತಿರೆ
ಅತ್ತಿದ್ದ ಸತ್ತಿದ್ದ ಗುಡಿಯ ಒಡೆಯ

ಕಾರ್ಗತ್ತಲಿನಲ್ಲೇ ಹಸಿದವರ ಬಂಡಾಯ
ಅಗುಳಿನಾಸೆಗೆ ಸೇರಿ ಸಾಗುತಿತ್ತು
ಕ್ರಾಂತಿಸರಪಳಿ ಆಗ ಶೋಷಕರ ಕೊರಳುಗಳ
ಬಿಗಿದಿತ್ತು ಒಗೆದಿತ್ತು ಕೊಲ್ಲುತಿತ್ತು

ಧರ್ಮಗುರುವಿನ ಪೀಠ ಮುಗ್ಗರಿಸಿ ಮುರಿದಿತ್ತು
ದೈವಗುಡಿ ಜನರಮನೆ ಆಗುತಿತ್ತು
ಕನಸೊಂದು ನನಸಾಗಿ ಕ್ರಾಂತಿಬೆಳೆ ಹುಲುಸಾಗಿ
ಬೆಳೆವುದೆನ್ನುವ ಆಸೆ ಮೂಡುತಿತ್ತು

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು