ಬೆಂಜಮಿನ್ ಮೊಲಾಯಿಸ್

ನೆಲದಾಳದ ಚಿನ್ನದ ಅದಿರು
ತೋಟಗಳ ಹಣ್ಣುಹಂಪಲು ಮಾತ್ರ ಗೊತ್ತಿದ್ದ
ಬಿಳಿಯ ದೊರೆ ಇಂದು ನಿದ್ದೆಗೇಡಿ
ಅವನ ಅರಮನೆಯ ಸುತ್ತ ಬೆಳೆಯುತ್ತಿರುವ
ಧಿಕ್ಕಾರದ ಹೊಸ ಬೆಳೆಯನ್ನು
ಉಣ್ಣಲಾರದ ಉಪವಾಸಿ
ತನ್ನ ಜಾತಿಯೇ ಪರಮಾಪ್ತನೆಂದು ತಿಳಿದೆ
ಬಿಳಿಯರಸ ಜನಕೋಟಿಯ ಮೆರವಣಿಗೆ ಎದುರಲ್ಲಿ ಒಬ್ಬಂಟಿ
ಆಫ್ರಿಕಾದ ಕತ್ತಲಲ್ಲಿ ಮಂಕಾಗಿ ಮಿನುಗುತ್ತಿದ್ದ ಕ್ರಾಂತಿ ಹಣತೆ
ಇದ್ದಕ್ಕಿದ್ದಂತೆ ಹತ್ತೂ ದಿಕ್ಕುಗಳನ್ನು ಬೆಳಗಿತು
ಮಾಯಾವಿ ಮಾಂಡೆಲಾ ಎಣ್ಣೆಯಾಗಿದ್ದ
ಬೆಂಜಮಿನ್ ಮೊಲಾಯಿಸ್ ಬತ್ತಿಯಾಗಿದ್ದ

ಸಾವಿನ ಕುಣಿಕೆ ಬೆಂಜಮಿನ್ನನ ಕೊರಳ ತಬ್ಬಿತ್ತು
ಸಾವು ಬಿಳಿಯರ ಸಾಮ್ರಾಜ್ಯಕ್ಕೊದಗಿ ಬಂದಿತ್ತು
ಬೂಟುಗಾಲಿನ ಒದೆತಕ್ಕೆ ಹುಚ್ಚುನಾಯಿಯ ಕಡಿತಕ್ಕೆ
ಬಣ್ಣಬಂದೂಕುಗಳ ಕುರುಡು ಆಳ್ವಿಕೆಗೆ
ರಕ್ತದುತ್ತರ ಕೊಟ್ಟವನೆ
ನೇಣುಗಂಬಕ್ಕಂಜದವನೆ
ಬೆಂಜಮಿನ್ ಮೊಲಾಯಿಸ್
ವ್ಯರ್ಥವಲ್ಲ ನಿನ್ನ ಬಲಿದಾನ

ಹೆಬ್ಬಂಡೆಯಡಿಯಲಿ ಹಸಿರು ಚಿಗುರಿ
ಹುಲ್ಲುಗಾವಲ ರೂಪ ತಾಳುವುದು
ಹೆತ್ತ ಕರುಳಿನ ಅಳಲ ತೊರೆ
ವರ್ಣಭೇದವ ಕೊಚ್ಚಿ ಎಸೆಯುವುದು
ಕಪ್ಪು ಹೃದಯದ ಬೆಳ್ಳಿ ಬೆಳಕು
ಬಿಳಿಯೆದೆಯ ಕತ್ತಲನು ಅಳಿಸಿ ಹಾಕುವುದು

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು