ಬಂದಿರುವರು ಹುಲಿಗಳಾಗಿ

ಒಪ್ಪೊತ್ತಿನ ತುತ್ತಿಗಾಗಿ ತತ್ತರಿಸುವ ಮೈಗಳನ್ನು
ಸುಪ್ಪತ್ತಿಗೆ ಮಾಡಿ ಮೆರೆವ ದರಬಾರಿನ ಧೀರರೆ
ಘೋರ ಹೆರಿಗೆ ನೋವುಗಳಿಗೆ ಬಂಗಾರದ ಭರವಸೆಗಳ
ಕೊಟ್ಟು ಕಾಲನೂಕುವಂಥ ಅಧಿಕಾರದ ಮಿಂಡರೆ

ಬಡಜನಗಳ ಗುಂಡಿಗೆಗಳ ಇಟ್ಟಿಗೆಗಳ ಗಟ್ಟಿಮಾಡಿ
ಸೌಧಗಳನ್ನು ಕಟ್ಟುವಂಥ ಚುನಾವಾಣೆಯ ವೀರರೆ
ಇತಿಹಾಸದ ಕತ್ತಲೆಯಲಿ ಕಾಣದಾದ ಸತ್ಯಗಳನ್ನು
ಸುಟ್ಟು ಬೂದಿ ಮಾಡುವಂಥ ಸತ್ಯ ಹರಿಶ್ಚಂದ್ರರೆ

ಭಾಷಣಗಳ ಬಡಿಸಿದಿರಿ ಘೋಷಣೆಗಳ ಕುಡಿಸಿದಿರಿ
ಸಂಕಟಗಳ ಕಂಪನಕ್ಕೆ ಕೊನೆಯಿಲ್ಲವೆ ಹೇಳಿರಿ
ನಿಮ್ಮ ಬೇಟೆಯುತ್ಸವದಲಿ ಕುರಿಗಳಾಗಿ ಸತ್ತ ಜನರು
ಬಂದಿರುವರು ಹುಲಿಗಳಾಗಿ ಗರ್ಜನೆಯನು ಕೇಳಿರಿ

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು