ಪ್ರೀತಿ ಮತ್ತು ಜ್ಯೋತಿಷ್ಯ

ಊರೂರ ತೇರಿಗೆ ಹಣ್ಣುದವನವ ಎಸೆದು
ಜೀವ ಕೊಟ್ಟರು ಎಲ್ಲ ಜಾತ್ರೆಗಳಿಗೆ
ಹುಣ್ಣಿಮೆಯ ಹಿಡಿದಿಟ್ಟು ಪ್ರೀತಿ ಪದಕವ ಮಾಡಿ
ಬೆಳಕ ತಂದರು ಕತ್ತಲಾಳಗಳಿಗೆ

ವಧುವ ಕೇಳಲು ಬಂದ ವರನ ಶಾಪವು ತಟ್ಟಿ
ಬಂಡೆಗಲ್ಲಿಗೆ ಹಡಗು ಢಿಕ್ಕಿಯೊಡೆದು
ಕಣ್ಣೀರ ಚೆಲ್ಲುತ್ತ ಜಾತಿಗಳ ಜರೆದರು
ದಿಕ್ಕೆಟ್ಟ ಹಕ್ಕಿಗಳು ಮೊರೆಯುವಂತೆ

ಆಪತ್ತು ಬಂದವಗೆ ಜ್ಯೋತಿಷಿಯೆ ಕಡುನೆಂಟ
ಅಲೆದು ಕಂಡನು ತರುಣ ಜ್ಯೋತಿಷಿಯನು
'ಒಲಿದ ಹೆಣ್ಣಿನ ಜೊತೆಗೆ ಹೋಗು ಯೋಜನದೂರ
ಅರಗಳಿಗೆ ನಿಲ್ಲದಿರು ಈ ಊರಿನಲ್ಲಿ'

ಬಿರುಗಾಳಿಯಂತವರು ಬಿರಬಿರನೆ ನಡೆದರು
ಬಿಟ್ಟ ಬಾಣದ ರೀತಿ ದಿಕ್ಕುಗಳ ಬಗೆದರು
ಏಳು ಬೆಟ್ಟವ ದಾಟಿ ಮೋಡಗಳ ಸೀಳಿ
ತಾರೆಗಳ ಗೊಂಚಲನು ಮಿನುಗಿಸುತ್ತ

ಇತ್ತ, ಹೊತ್ತಾಯಿತೆನ್ನುತ ಚಿಲ್ಲರೆ ಸದ್ದಿನಲಿ
ಜ್ಯೋತಿಷಿಯು ಜೋರಾಗಿ ಮನೆಗೆ ಬಂದ
'ಒಲಿವ ಹಂಬಲಿಸಿ ಹೋದವಳ ಮರೆತು ಬಿಡಿ'
ಎಂಬ ಮುದ್ದಿನ ಮಗಳ ಪತ್ರ ಕಂಡ

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು