ಪಂಚನದಿಗಳ ಹಾಡು

ಕಂಬನಿಯ ಕಾಲುವೆಯು ಹರಿಯುತ್ತಲಿಹುದೇಕೆ
ಪಂಚ ನದಿಗಳು ಹರಿವ ನಾಡಿನಲ್ಲಿ
ಮನಮನದ ಒಳಗೆಲ್ಲ ದಟ್ಟಹೊಗೆ ನಿಟ್ಟುಸಿರು
ಕೂಗಿ ಕುಣಿಯುವ ಸಾವು ಕೊನೆಯಾಗದೆ

ಜಾತಿಮತಗಳ ಹುಚ್ಚು ಕಾಳಸರ್ಪಗಳಾಗಿ
ಕಂದಮ್ಮಗಳ ಕಣ್ಣು ಕುಕ್ಕುತಿಹವು
ಗೋಧಿಯನು ಬೆಳೆವಲ್ಲಿ ಕೋವಿಗಳ ಬೆಳೆಯಾಗಿ
ಮುಗ್ಧರೆದೆಗಳು ಚೂರುಚೂರಾದವು

ಹಕ್ಕಿಗಳು ಚುಕ್ಕೆಗಳು ಮುಗಿಲ ಸಾಲಿನ ಬದಲು
ಕತ್ತು ಹಿಸುಕುವ ಕಯ್ಯಿ ಬಾನಿನಲ್ಲಿ
ಹೂ ಹೆಣ್ಣು ಹೆಜ್ಜೇನು ಗೆಜ್ಜೆಗಳ ದನಿಯಿಲ್ಲ
ಒಡಲ ಸೀಳುವ ಬೆಂಕಿ ಭೂಮಿಯಲ್ಲಿ

ಬಯಲೊಳಗೆ ಬನದೊಳಗೆ ಸುಡುವ ಬಂಡೆಯ ಮೇಲೆ
ಭೋರೆಂದು ವಿಷಗಾಳಿ ಬೀಸುತಿಹುದು
ನದಿಕೊಳ್ಳ ಹೊಳೆಹಳ್ಳ ಕಡಲ ನೀರುಗಳಲ್ಲಿ
ಅಣ್ಣತಮ್ಮರ ರಕ್ತ ಸೇರುತಿಹುದು

ಪ್ರಾಣಮಿತ್ರರು ಕೂಡ ಗುರುತು ಸಿಕ್ಕದ ಹಾಗೆ
ಕತ್ತಲೆಯು ಬಲೆ ಬೀಸಿ ಕುಣಿಯುತಿಹುದು
ಸಮತೆ ಸೋದರ ಭಾವ ಮಮತೆ ಪ್ರೀತಿಯ ಬೆಳಗಿ
ತಣಿಸಿದ್ದ ಹೊಂಬೆಳಕು ಏನಾಯಿತೊ

-
ಕವಿ - ಡಾ. ಸಿದ್ಧಲಿಂಗಯ್ಯ
ಹಕ್ಕುಗಳು: ಲೇಖಕರದು